Қинғир йўл билан кирган талабалар ўрнини тўлдириш масаласи
Мавзуни давом эттириб
Менда яна битта қизиқ савол бор:
Қинғир йўл билан кирган талабалар ОТМдан четлатилди ҳам дейлик. Хўш, уларнинг ўрнига пастдаги талабалар тепага кўтариладими?
Айтмоқчиманки, 3 нафар талаба ноқонуний йўл билан бюджетга кирган бўлсаю, кейинчалик улар четлатилса, унда ўша бўшаган 3 та ўринга контрактнинг энг тепасида турган 3 нафар контрактдаги талабалар бюджетга ўтиши керак эмасми?
Ёки ўқишга кира олмаганлар рўйхатининг энг юқорисида турган абитуриентлар супер-контракт эмас, балки оддий контрактга кириши керак эмасми?
ШУНДАЙ ҚИЛИШ КЕРАК!
Ана шунда ҳақиқий ижтимоий адолат қилинган бўлади. Ахир тестга масъулларнинг айби ва хатоси натижасида кимлардир қинғир йўл билан ўқишга кирган бўлса, бундан оддий абитуриентлар азият чекмаслиги керак-ку.
Масалан, бюджетга атиги 1 балл етмай контрактга кирган талабани олайлик. Агар тест синовларида ҳеч ким қинғир йўл билан ўқишга кира олмаганда эди, ўша абитуриент худди шу балл билан контрактга эмас, балки бюджетга кирарди, тўғрими? Аммо афсуски бундай бўлмади, ўта қаттиқ назоратда ҳам айримлар "ўйин" қила олишди. Тегишли идораларнинг саъй-ҳаракати билан эртами-кечми, улар фош ҳам этилди. Баракалла! Лекин савоб ишни охиригача қилиш керак эмасми?
Ўзининг эмас, ўзгаларнинг айби билан контрактга кирганлар, ўқишга умуман кира олмасдан супер-контрактга тушганларнинг ҳуқуқини ҳам тиклаш керак, менимча.
Буларнинг барчаси ИМХО албатта.
P.S.: ТДЮУдаги ҳолат тест синовларидаги шахсни идентификациялаш тизими биз кутганчалик ишончли эмаслигини кўрсатиб берди. Тошкентнинг қоқ марказида, боз устига назорат ўта қаттиқ бўлади, дея таъкидланган Юридик университетда абитуриентларнинг ўрнига бошқалар кириб кетган эканми, қолган жойлардан шубҳа қилишга тўла ҳақлимиз. Йўқ, мен кимнидир айбламоқчи эмасман. Сабаби илгари ҳам кўп айтгандим, янгича услубдаги тест синовларининг биринчи йилида хато ва камчиликлар бўлиши табиий, бундан дарров фожиа ясамаслик керак. Асосийси ушбу камчиликлар устида ишлаб, кейинги йилда бундай қинғирликларни максимал даражада камайтиришга ҳаракат қилиш керак (бутунлай йўқотиб бўлмайди барибир).
Каналга уланиш: 👇
https://t.me/joinchat/AAAAAEe1KDC7Hm03UPVooQ
