Ўзбек тилига давлат тили мақоми берилганига 31 йил тўлди
Расул Ҳамзатов бир асарида шундай эслайди:
Аварлар қишлоғидан бир йигит Францияга ўқишга кетиб, ўша ерда қолиб кетади. Бошқа бир ҳамқишлоғи Францияга бориб келгач, йигитнинг онаси ўғли ҳақида сўрашга шошилади:
- Ўғлим билан кўришдингизми?
- Ҳа, кўришдим.
- Ўғлим Сиз билан қайси тилда гаплашди: авар тилидами ёки француз?
- Француз тилида.
- Унда у менинг ўғлим эмас!
Бугун ўзбек тилига давлат тили мақоми берилганига 31 йил тўлди. Афсуски бугунги кунда ўзбек тилининг аҳволи жуда ҳавас қилгулик даражада бўлмаса ҳам, лекин ҳар не бўлмасин, гўзал она тилимизнинг борига шукр.
Гарчи аксариятимиз фақат байрамлар арафасида ўзбек тилини улуғлаб, унга қасидалару шеърлар битиб, мажлислару тадбирларда оташин нутқлар ирод қилиб, бир-биримизни байрам билан табриклаб чиройли расмлар юбориб, ўз она тилимизни жуда қаттиқ севишимизни ҳаммага баралла айтиб юрсак-да, байрам ўтиши билан ўзбек тилининг қадри яна эсимиздан чиқиб кетади. Бу худди оналаримизни туғилган кунида юксакларга кўтариб, қолган пайтда ёки билиб, ёки билмай уларнинг қалбини ранжитишимизга ўхшайди. Ўзбек тили эса оналарча ҳокисорлик билан буларнинг барчасига сабр қилади, ҳар қандай муносабат бўлмасин фарзандларининг бошини силашда, меҳрибонлик қилишда давом этаверади. Ҳаттоки ўша фарзандларининг орасида айримлари бошқа бировни онам деб эълон қилиб, ўз волидасини тан олмаётган бўлса ҳам...
Қандайин бағрикенг ва камсуқум она тилимиз бор-а?!
Ўзлигимизнинг асосий белгиси бўлган ўзбек тилининг умри боқий бўлсин!
👉 @xushnudbek 👈
